Global Gujarati’s blog

Gujarati Dil ni Dhadkan

તારી શોધમાં

સ્થગિત નથી,ચલિત છું
કેમ કે શોધ માં છું, ખોજ માં છું
તારી શોધમાં,તારી ખોજ મા.
દરેક જગ્યાએ, હરએક દુનિયામાં.

ને દુનિયા પણ ક્યાં એક છે ? અનેક છે,
ખુલી આંખોની દુનિયા અને બંધ આંખોની દુનિયા
સપનાઓ ની દુનિયા ને કલ્પનાઓની દુનિયા

તું સપના ની દુનિયા માં મળે છે.
જાગું ત્યાં તું નથી.અને હું કલ્પનાંની દુનિયા માં
જાઉં છુ. જ્યાં તું છે, બસ તુ જ છે. અને તુ છે એથી
પણ વધારે તું છે.

ગજબ જીદ છે મારી પણ,
તને ગમે ત્યાં  શોધી લઉં છું.
પછી તે અવકાશી વાદળોની આકૃતિ હોય
કે સિગારેટનાં ધુમાળાઓની આકૃતિ.
તને મેળવીને જ રહું છું.

                                                               –  મનિષ.

Advertisements

ફેબ્રુવારી 9, 2009 Posted by | Ghazals, Uncategorized | | 2 ટિપ્પણીઓ

કોક દી ફુરસત મળે તો લે ખબર

કોક દી ફુરસત મળે તો લે ખબર
દીલ ઉપર વીતે છે શુ તારા વગર

પાનખરમા પણ બહાર આવી ગઇ
પ્રેમ ગીતોની અનોખી છે અસર

આખમાં તુજ યાદના આસુ ના હો
એક પણ વીતી નથી એવી પ્રહર

એજ છે રજની દીવાનો જોઇ લો
ગાય છે ગીતો ઉષાના દરબદર

ફેબ્રુવારી 9, 2009 Posted by | Ghazals, Uncategorized | Leave a comment

આસિમ રાંદેરી

ક્યારેય નહિ ભુલી શકાય આસિમ સાહેબ આપને
લીલાને અને કંકોતરી જેવી અનેક રચનાઓને…….

મારી એ કલ્પના હતી, વીસરી મને,
કિન્તુ એ માત્ર ભ્રમ હતો થૈ ખાતરી મને,
ભૂલી વફાની રીત, ન ભૂલી જરી મને,
લ્યો એના લગ્નની મળી કંકોતરી મને !
સુંદર ના કેમ હોય, કે સુંદર પ્રસંગ છે,
કંકોતરીમાં રૂપ છે, શોભા છે, રંગ છે !

કાગળનો એનો રંગ છે ખીલતા ગુલાબ સમ,
જાણે ગુલાબી એના વદનના જવાબ સમ,
રંગીનીઓ છે એમાં ઘણી ફૂલછાબ સમ,
જાણે કે પ્રેમ-કાવ્યોની કોઇ કિતાબ સમ !
જાણું છું એના અક્ષરો વર્ષોના સાથથી,
શિરનામું મારૂ કીધું છે ખુદ એના હાથથી.

છે એને ખાતરી કે હું આવું નહીં કદી,
મારી ઉપર સભાને હસાવું નહીં કદી,
દીધેલ કૉલ યાદ અપાવું નહીં કદી,
મુજ હાજરીથી એને લજાવું નહીં કદી,
દુઃખ છે હજાર, તો ય હજી એ જ ટેક છે,
કંકોતરી નથી, આ અમસ્તો વિવેક છે !

કંકોતરીથી એટલું પુરવાર થાય છે,
નિષ્ફળ બને છે પ્રેમ તો વે’વાર થાય છે-
જ્યારે ઉઘાડી રીતે ન કંઈ પ્યાર થાય છે,
ત્યારે પ્રસંગ જોઈ સદાચાર થાય છે.
ગંભીર છે આ વાત કોઈ મશ્કરી નથી,
તકદીરનું લખાણ છે, કંકોતરી નથી !

કાગળનો એક કટકો છે જોવામાં એમ તો,
ભરપૂર છે એ પ્રેમની ભાષામાં એમ તો,
સુંદર, સળંગ રમ્ય છે શોભામાં એમ તો,
છે ફૂલસમ એ હલકો લિફાફામાં એમ તો,
કોમળ વદનમાં એના, ભલે છે હજાર રૂપ,
મારા જીવન ઉપર તો બરાબર છે ભારરૂપ !

એને ભલેને પ્રેમથી જોયા નહીં કરું,
વાચન કરીને દિલ મહીં ચીરા નહીં કરું,
સંયમમાં હું રહીશ, બળાપા નહીં કરું,
આવેશમાં એ ‘ફૂલ’ ના કટકા નહીં કરું.
આ આખરી ઇજન છે હૃદયની સલામ દઉં,
‘લીલા’ના પ્રેમ-પત્રમાં એને મુકામ દઉં.

‘આસિમ’ ! હવે એ વાત ગઈ, રંગ પણ ગયો,
તાપી તટે થતો જે હતો સંગ પણ ગયો,
આંખોની છેડછાડ ગઈ વ્યંગ પણ ગયો,
મેળાપની એ રીત ગઈ ઢંગ પણ ગયો.
હું દિલની લાગણીથી હજી પણ સતેજ છું,
એ પારકી બની જશે, હું એનો એ જ છું !

—આસિમ રાંદેરી

ફેબ્રુવારી 9, 2009 Posted by | Ghazals, Uncategorized | Leave a comment